Қазақстанда өңдеу өнеркәсібі экспорты соңғы 5 жылда 45%-дан асты

Мемлекет басшысы Қасым-Жомарт Тоқаев Республика күніне арналған салтанатты жиындағы сөзінде еліміздің озық технологияға негізделген өндірісті дамытуға жол ашқанын айтты. Бұл туралы Egemen.kz Ақорданың баспасөз қызметіне сілтеме жасап хабарлайды. Президенттің айтуынша, соңғы 5 жылдың ішінде өңдеу өнеркәсібіндегі экспорт көлемі 45 пайыздан асты, ал Қазақстан индустриясы дамудың жаңа сапалық деңгейіне көтерілуде.

Мемлекет басшысы теміржол саласында соны серпіліс жасалғанын атап өтті. Рельстер мен шпалдардан бастап вагондар мен электровоздарға дейінгі қажеттінің бәрі енді елде өндіріледі. Автокөлік шығару да қарқын алды: жыл сайын конвейерден 150 мыңнан аса жеңіл және жүк көлігі шығады. Соңғы жеті жылда тартылған шетелдік қаражат көлемі 155 миллиард долларға жетті.

Президент жыл басынан бері жалпы сомасы 60 миллиард доллар болатын 355 коммерциялық келісімге қол қойылғанын айтты. Қазақстан Еуразияның жетекші көлік-логистика хабы ретіндегі позициясын нығайтты. Әуежайлар, вокзалдар, көпірлер, теңіз айлақтары салынып, жөнделді, ал шекара маңындағы инфрақұрылым жаңғыртылып жатыр.