Qazaxıstanda emal sənayesinin ixracı son 5 ildə 45%-dən çox artıb

Qazaxıstan Prezidenti Qasım-Comərd Tokayev Respublika Gününə həsr olunmuş təntənəli mərasimdəki çıxışında ölkənin qabaqcıl texnologiyaya əsaslanan istehsalın inkişafına yol açdığını bildirib. Egemen.kz xəbəri Prezident Administrasiyasının mətbuat xidmətinə istinadən verir. Prezidentin sözlərinə görə, son 5 ildə emal sənayesində ixrac həcmi 45 faizdən çox artıb.

Prezident dəmir yolu sahəsində yeni inkişafdan danışıb: relslərdən və şpallardan vaqon və elektrovozlara qədər lazım olan hər şey artıq ölkədə istehsal olunur. Avtomobil istehsalı da sürətlənib, hər il konveyerdən 150 mindən çox yüngül və yük avtomobili çıxır. Son yeddi ildə cəlb olunmuş xarici investisiyanın həcmi 155 milyard dollara çatıb.

Prezident həmçinin ilin əvvəlindən bəri ümumi məbləği 60 milyard dollar olan 355 kommersiya müqaviləsinin imzalandığını bildirib. Qazaxıstanın Avrasiyanın aparıcı nəqliyyat-logistika mərkəzi kimi mövqeyi möhkəmlənir. Hava limanları, vağzallar, körpülər və dəniz limanları tikilib və ya təmir edilib.