Ozarbayjon Turkiy investitsiya jamgʻarmasi Boshqaruvchilar kengashi raisligini oldi

Ozarbayjon keyingi yillik yigʻilishgacha Turkiy investitsiya jamgʻarmasi Boshqaruvchilar kengashi raisligini oʻz zimmasiga oldi. Bu haqda Ozarbayjon Iqtisodiyot vazirligi Toshkentda jamgʻarma Boshqaruvchilar kengashi yigʻilishidan soʻng xabar berdi. Yigʻilishda qabul qilingan qaror asosida Vengriya kengash raisi oʻrinbosari etib tayinlandi.

Yigʻilish ishtirokchilari Turkiy investitsiya jamgʻarmasi faoliyatini kengaytirish va aʼzo davlatlar oʻrtasida investitsiya hamkorligini mustahkamlash masalalarini muhokama qilishdi. Ular jamgʻarmaning Turkiy dunyoda iqtisodiy integratsiyani chuqurlashtirish, oʻzaro investitsiyalar va qoʻshma loyihalarni ragʻbatlantirishdagi rolini taʼkidlashdi. Shuningdek, jamgʻarma faoliyatini tashkil etish, moliyalashtirish imkoniyatlarini kengaytirish hamda xalqaro moliya institutlari bilan hamkorlikni rivojlantirish masalalari koʻrib chiqildi.

Ozarbayjon Iqtisodiyot vazirining birinchi oʻrinbosari Elnur Aliyev mamlakatning hamkor davlatlar bilan ikki tomonlama investitsiya jamgʻarmalarini tashkil etish tajribasini taqdim etdi. U Turkiy investitsiya jamgʻarmasi va ushbu institutlar oʻrtasidagi aloqalarni mustahkamlash hamda qoʻshma moliyalashtirish mexanizmlarini yaratishni taklif qildi.