Әзербайжан Түркі инвестициялық қорының басқарушылар кеңесіне төрағалық етеді

Әзербайжан Түркі инвестициялық қорының басқарушылар кеңесінің төрағалығын келесі жылдық мәжіліске дейінгі мерзімге қабылдады. Бұл туралы Әзербайжан экономика министрлігі Ташкентте өткен қор басқарушылар кеңесінің отырысынан кейін мәлімдеді. Report басылымының хабарлауынша, отырыста қабылданған шешімге сәйкес Венгрия кеңес төрағасының орынбасары болып тағайындалды.

Отырыста қатысушылар қордың қызметін кеңейту және мүше мемлекеттер арасындағы инвестициялық ынтымақтастықты нығайту мәселелерін талқылады. Олар қордың түркі әлемінде экономикалық интеграцияны тереңдетудегі, өзара инвестицияны ынталандырудағы және бірлескен жобаларды іске асырудағы рөлін атап өтті. Сондай-ақ қызметті ұйымдастыру, қаржыландыру мүмкіндіктерін кеңейту және халықаралық қаржы институттарымен ынтымақтастықты дамыту мәселелері қаралды.

Әзербайжан экономика министрлігінің бірінші орынбасары Элнур Әлиев серіктес елдермен екіжақты инвестициялық қорлар құру тәжірибесін таныстырды. Ол Түркі инвестициялық қоры мен осы институттар арасындағы байланысты нығайтуды және бірлескен қаржыландыру тетіктерін құруды ұсынды.