Gruziya va Markaziy Osiyo davlatlari Oʻrta koridor salohiyatini muhokama qildi

Gruziya va beshta Markaziy Osiyo davlati, yaʼni Turkmaniston, Qozogʻiston, Qirgʻiziston, Tojikiston va Oʻzbekiston 23 oktyabrda Batumida tashqi ishlar vazirlarining birinchi qoʻshma uchrashuvini oʻtkazdi.

Gruziya Tashqi ishlar vazirligining maʼlumotiga koʻra, uchrashuvda Gruziya va Markaziy Osiyo davlatlari oʻrtasidagi sheriklik munosabatlarini rivojlantirish, siyosiy muloqotni mustahkamlash hamda umumiy manfaatlarga asoslangan hamkorlikni kengaytirish masalalari muhokama qilindi.

Ishtirokchilar Gruziya va Markaziy Osiyoning Yevropa va Osiyo oʻrtasidagi aloqalarni mustahkamlashdagi rolini taʼkidladilar. Muzokaralarda Oʻrta koridorni rivojlantirish va uning salohiyatidan toʻliq foydalanishga alohida eʼtibor qaratildi. Tomonlar, shuningdek, iqtisodiyot, savdo, transport va turizm sohalarida hamkorlikni chuqurlashtirish imkoniyatlarini koʻrib chiqdilar. Ishtirokchilar bu formatning hamkorlikni mustahkamlashdagi ahamiyatini taʼkidladilar va hamkorlikni davom ettirishga tayyorliklarini bildirdilar.