Gürcüstan və Mərkəzi Asiya ölkələri Orta Dəhlizin potensialını müzakirə edib

Gürcüstan və Türkmənistan, Qazaxıstan, Qırğızıstan, Tacikistan və Özbəkistan olmaqla beş Mərkəzi Asiya ölkəsi 23 oktyabrda Batumidə xarici işlər nazirlərinin ilk birgə görüşünü keçirib.

Gürcüstan Xarici İşlər Nazirliyinə istinadən verilən məlumata görə, görüşdə Gürcüstan və Mərkəzi Asiya ölkələri arasında tərəfdaşlıq münasibətlərinin inkişafı, siyasi dialoqun gücləndirilməsi və ortaq maraqlara əsaslanan əməkdaşlığın genişləndirilməsi müzakirə olunub.

İştirakçılar Gürcüstanın və Mərkəzi Asiyanın Avropa ilə Asiya arasında əlaqələrin gücləndirilməsindəki rolunu vurğulayıblar. Müzakirələrdə Orta Dəhlizin inkişafına və onun potensialından tam istifadə edilməsinə xüsusi diqqət yetirilib. Tərəflər həmçinin iqtisadiyyat, ticarət, nəqliyyat və turizm sahələrində əməkdaşlığın dərinləşdirilməsi imkanlarını nəzərdən keçiriblər. İştirakçılar bu formatın tərəfdaşlıqların möhkəmləndirilməsi üçün əhəmiyyətini qeyd edib və əməkdaşlığı davam etdirməyə hazır olduqlarını bildiriblər.