Oʻzbekistonda chet elda ishlayotgan malakali shifokorlarni vatanga qaytarish tizimi ishga tushdi

Prezident Shavkat Mirziyoyev tibbiyot va farmatsevtika sohasi xodimlari bilan uchrashuvda chet elda ishlayotgan malakali oʻzbek shifokorlarini vatanga qaytarish boʻyicha yangi tizim boshlanganini maʼlum qildi. Uning soʻzlariga koʻra, xorijiy klinikalarda tajriba toʻplagan vatandosh shifokorlar mamlakat shifoxonalariga jalb etiladi. Prezident bu tizim Yangi Oʻzbekiston tibbiyotida oʻz maktabini yaratishga xizmat qilishini taʼkidladi.

Bunday mutaxassislarning oylik ish haqiga 50 million soʻmgacha ustama toʻlanadi. Ish joylari zamonaviy uskunalar bilan jihozlanadi. Ularga atrofida kuchli jamoa shakllantirish, birga ishlaydigan shifokor, assistent va hamshiralarni mustaqil tanlash imkoniyati beriladi. Nufuzli konferensiyalarda qatnashish va xorijdagi hamkasblari bilan tajriba almashish xarajatlari qoplanadi.

Bu ishlar 26 ta ixtisoslashgan markazdan boshlanadi. Har bir markaz direktori kelasi yili 5–10 nafar vatandosh shifokorni jalb etishga masʼul boʻladi.