Mirziyoyev: Garvard bilan hamkorlikda Oʻzbekistonda genetik tekshiruvlar joriy etiladi

Prezident Shavkat Mirziyoyev tibbiyot va farmatsevtika sohasi xodimlari bilan uchrashuv oʻtkazdi. U kelasi yil har bir hududga kamida 150 mln dollar investitsiya va grant jalb qilish vazifasini qoʻydi, hududlar rahbarlariga tegishli topshiriqlar berildi. Genomika, hujayra va biotexnologiyalar orqali ilgari davolash imkonsiz boʻlgan koʻplab kasalliklarga yechim topilayotgani qayd etildi.

Mirziyoyev inson huquqi, roziligi va qadr-qimmati tadqiqotlarda birinchi oʻrinda turishi shartligini taʼkidladi. Shu bois bioetika va biotexnologiya sohalari uchun mustahkam huquqiy asos yaratiladi. Garvard tibbiyot maktabi bilan hamkorlikda irsiy kasalliklar boʻyicha mutaxassislar oʻqitiladi va genetik tekshiruv joriy etiladi.

Respublika shoshilinch yordam markazida shakllangan neyroxirurgiya boʻyicha katta maktab tajribasini hududlarga yetkazish zarurligi taʼkidlandi. Buning uchun jarroh, anesteziolog, reanimatolog, assistent va hamshiralardan iborat yaxlit jamoalar joylarga yuboriladi. Tibbiyot guruhlari markazlarda 3-4 oylik stajirovkadan oʻtkaziladi.