Shavkat Mirziyoyev sogʻliqni saqlash xodimlari bilan uchrashdi: yangi tibbiy standartlar joriy etiladi

Prezident Shavkat Mirziyoyev Kuksaroy qarorgohida sogʻliqni saqlash va farmatsevtika sohasi xodimlari bilan uchrashdi. U yaqinlashib kelayotgan kasbiy bayram munosabati bilan ishtirokchilarni tabrikladi va ularning inson salomatligi yoʻlidagi fidokor mehnati uchun minnatdorchilik bildirdi.

Prezident soʻnggi oʻn yil ichida 10 million kishiga xizmat koʻrsatadigan yangi poliklinika va kasalxonalar ishga tushirilganini, 58 ming koʻrpa-joy yaratilganini hamda tibbiy xizmatlar hajmi uch baravar oshganini aytdi. Farmatsevtika sohasida 1 milliard dollar qiymatidagi 330 ta yangi quvvat ishga tushirildi. Maqsad mamlakat dori-darmonga boʻlgan ehtiyojining 70 foizini ichki imkoniyatlar hisobiga qoplashdir.

28 ta tumanda sinovdan oʻtkazilgan yangi tizimda 7 million aholi oilaviy shifokorlarga biriktirildi. Keyingi yil bu model yana 100 ta tumanga joriy etiladi. Shuningdek, "Yangi Oʻzbekistonning tibbiy standartlari" joriy etilishi va "Ibn Sino" ordeni taʼsis etish taklif qilindi.