Qozogʻiston Bosh vaziri Bektenov inflyatsiyani pasaytirish choralarini topshirdi

Qozogʻiston Bosh vaziri Oljas Bektenov inflyatsiyani nazorat qilish va yanada pasaytirish uchun davlat organlariga bir qator topshiriqlar berdi. U Prezident Qosim-Javohir Tokayevning “Qozogʻistonning yangi tarixiy davrdagi dolzarb vazifalari” nomli Murojaatini amalga oshirishga bagʻishlangan hukumat yigʻilishida gapirdi.

Bektenov tizimli choralar koʻrish zarurligini va “buning uchun barcha imkoniyatlar mavjudligini” aytdi. Milliy iqtisodiyot vazirligi Milliy bank bilan birgalikda 20-noyabrgacha inflyatsiyani pasaytirish va aholi real daromadlarini oshirishga qaratilgan soliq-byudjet va pul-kredit siyosatini muvofiqlashtirish choralarini ishlab chiqishi kerak.

Hokimliklar oziq-ovqat narxlarini barqarorlashtirish choralari samaradorligini har hafta kuzatib borishi kerak. Savdo va integratsiya vazirligi viloyat hokimliklari bilan birgalikda ijtimoiy ahamiyatga ega oziq-ovqat mahsulotlariga nisbatan savdo ustamasining chegaraviy miqdori ustidan nazoratni kuchaytiradi. Ikki hafta ichida savdo, integratsiya va qishloq xoʻjaligi vazirliklari qishki davr uchun yetarli oziq-ovqat zaxiralarini shakllantirishi, barqarorlashtirish jamgʻarmalarini faollashtirishi va toʻgʻridan-toʻgʻri yetkazib berishni kengaytirishi kerak.