Qazaxıstan baş naziri Olcas Bektenov inflyasiyanın azaldılması üçün tapşırıqlar verib

Qazaxıstan Baş naziri Olcas Bektenov inflyasiyanın qarşısının alınması və daha da azaldılması üçün dövlət orqanlarına bir sıra tapşırıqlar verib. O, Prezident Qasım-Comart Tokayevin “Qazaxıstanın yeni tarixi dövrdə aktual vəzifələri” adlı Müraciətinin həyata keçirilməsinə həsr olunmuş hökumət iclasında danışıb.

Bektenov sistemli tədbirlərin görülməsinin zəruri olduğunu və “bunun üçün bütün imkanların mövcud olduğunu” bildirib. Milli İqtisadiyyat Nazirliyi Milli Bankla birlikdə 20 noyabra qədər maliyyə-büdcə və pul-kredit siyasətinin koordinasiyasını gücləndirən tədbirləri hazırlamalıdır.

Akimatlar ərzaq qiymətlərinin sabitləşdirilməsi tədbirlərinin effektivliyini hər həftə izləməlidir. Ticarət və İnteqrasiya Nazirliyi regionların akimatları ilə birlikdə sosial əhəmiyyətli ərzaq məhsullarında ticarət əlavələrinin həddinə nəzarəti gücləndirəcək. İki həftə ərzində ticarət, inteqrasiya və kənd təsərrüfatı nazirlikləri qış üçün kifayət qədər ərzaq ehtiyatı yaratmalı, stabilləşdirmə fondlarını aktivləşdirməli və birbaşa ərzaq tədarükünü genişləndirməlidir.