Қазақстан Премьер-министрі Олжас Бектенов инфляцияны төмендету жөнінде тапсырма берді

Қазақстан Премьер-министрі Олжас Бектенов инфляцияны тежеу және одан әрі төмендету жөнінде мемлекеттік органдарға бірқатар тапсырма берді. Ол Президент Қасым-Жомарт Тоқаевтың «Қазақстанның жаңа тарихи кезеңдегі өзекті міндеттері» атты Жолдауын іске асыруға арналған Үкімет отырысында сөйледі. Бектеновтың айтуынша, Жолдауда тұрақты экономикалық өсуді қамтамасыз етуге, инвестициялық ахуалды жақсартуға және мемлекеттік аппарат тиімділігін арттыруға ерекше назар аударылған.

Премьер жүйелі шаралар қабылдау қажет екенін атап өтіп, «Мұның бәрі үшін барлық мүмкіндіктер бар» деді. Ұлттық экономика министрлігіне Ұлттық Банкпен және мемлекеттік органдармен бірлесіп, 20 қарашаға дейін инфляцияны төмендетуге және халықтың нақты кірісін арттыруға бағытталған салық-бюджет және ақша-несие саясатының үйлестірілуін күшейту шараларын әзірлеу тапсырылды.

Әкімдіктер азық-түлік бағасын тұрақтандыру шараларының тиімділігіне апта сайын мониторинг жүргізіп отыруы керек. Сауда және интеграция министрлігіне өңірлердің әкімдіктерімен бірлесіп, әлеуметтік маңызы бар азық-түлік тауарларына арналған шекті сауда үстемеақысын сақтауды күшейту тапсырылды. Екі апта ішінде сауда, интеграция және ауыл шаруашылығы министрліктері қыс мезгіліне жеткілікті азық-түлік қорын қалыптастыруы, тұрақтандыру қорларының жұмысын белсендіруі және тікелей азық-түлік жеткізуді кеңейтуі тиіс.