Özbəkistanda reklam SMS və zənglərinə yeni qaydalar tətbiq olunur

Özbəkistanda 1 noyabrdan reklam xarakterli SMS və reklam zənglərinə dair yeni qaydalar tətbiq olunur. Şirkətlər və mobil operatorlar abonentlərə yalnız istifadəçilərin əvvəlcədən razılığı olduqda reklam mesajı göndərə biləcəklər. Razılıq yazılı və ya elektron formada verilməlidir.

Mobil şəbəkələr vasitəsilə reklam zəngləri və SMS-lər 18:00-dan 09:00-a qədər qadağan edilir. Abonentlər reklam almaq istəyib-istəmədiklərini özləri müəyyən edə və operatorlarından blokirovka üçün müraciət edə biləcəklər. Reklam tam və ya qismən məhdudlaşdırıla bilər.

Kütləvi reklam göndərişi aparan şirkətlər istifadə etdikləri sistemləri dövlət şəxsi məlumatların emalı reyestrində qeydiyyatdan keçirməlidirlər. Qaydaları pozanlara məsuliyyət tədbirləri nəzərdə tutulub. Sənəd, həmçinin 1 oktyabr 2026-cı ildən vətəndaşların şəxsi məlumatları dəyişdikdə, məlumatların dövlət bazalarında idarələrarası mübadilə sistemi vasitəsilə avtomatik yenilənməsini təmin edir.