Qozogʻistonda 2027-yil uchun “7-20-25” ipoteka limiti 100 milliard tengeda tasdiqlandi

Qozogʻiston Milliy banki “7-20-25” ipoteka dasturi doirasida 2027-yil uchun moliyalashtirish hajmini 100 milliard tenge miqdorida tasdiqladi. Tegishli qaror Milliy bank tomonidan qabul qilindi. Qozogʻiston barqarorlik jamgʻarmasi (QBJ) xabar berishicha, choraklik moliyalashtirish hajmi 25 milliard tengedan oshmaydi.

Jamgʻarma dasturning operatori hisoblanadi. Banklar “7-20-25” dasturi boʻyicha imtiyozli kreditlarni oʻzlari beradi, QBJ esa belgilangan limit doirasida ushbu qarzlar boʻyicha talab qilish huquqini ulardan sotib oladi.

“7-20-25” ipoteka dasturi 2018-yilda ishga tushirilgan boʻlib, uy-joysiz qozogʻistonliklarga qulay shartlarda kredit olish imkonini bergan birinchi imtiyozli dastur boʻldi. Kredit stavkasi 7 foiz, boshlangʻich badal 20 foizdan boshlanadi, qarz muddati 25 yilgacha. Koʻchmas mulkning chegaraviy qiymati Ostona, Almaty (atrof hududlar bilan birga), Oqtov, Atirov va Shimkent uchun 30 million tenge, Qarogʻandi uchun 25 million tenge, boshqa hududlar uchun 20 million tenge. Dastur 2029-yilgacha amal qiladi va faqat birlamchi bozordan uy-joy sotib olishga qaratilgan.