Qazaxıstanda 2027-ci il üçün “7-20-25” ipoteka limiti 100 milyard tenge təsdiqlənib

Qazaxıstan Milli Bankı “7-20-25” ipoteka proqramı çərçivəsində 2027-ci il üçün maliyyələşmə həcmini 100 milyard tenge məbləğində təsdiqləyib. Müvafiq qərar Milli Bank tərəfindən qəbul edilib. Qazaxıstanın Dayanıqlılıq Fondu (QDF) xəbər verib ki, rüblük maliyyələşmə həcmi 25 milyard tengedən artıq olmayacaq.

Fond proqramın operatorudur. Banklar “7-20-25” proqramı üzrə güzəştli kreditləri özləri verirlər, QDF isə müəyyən edilmiş limit daxilində həmin borclar üzrə tələb hüququnu onlardan alır.

“7-20-25” proqramı 2018-ci ildə işə salınıb və mənzili olmayan qazaxıstanlılara əlverişli şərtlərlə kredit almaq imkanı verən ilk güzəştli proqram olub. Kredit faizi 7 faiz, ilkin ödəniş 20 faizdən başlayır, kredit müddəti 25 ilə qədərdir. Daşınmaz əmlakın həddi dəyəri Astana, Almatı (ətraf ərazilər daxil olmaqla), Aktau, Atırau və Şımkənd üçün 30 milyon tenge, Qaraqanda üçün 25 milyon tenge, digər regionlar üçün 20 milyon tengedir. Proqram 2029-cu ilə qədər qüvvədə qalacaq və yalnız ilkin bazardan mənzil alınmasına yönəlib.