Azərbaycanın 2027-ci il büdcəsi neftin barel qiyməti 65 dollar götürülərək hazırlanıb

Azərbaycanın 2027-ci il büdcə proqnozlarında neftin qiymətinin dəyişməsi ilə bağlı xarici iqtisadi risklər nəzərə alınıb. Büdcənin hesablanmasında neftin bir barelinin qiyməti 65 ABŞ dolları götürülüb.

İqtisadiyyat nazirinin müavini Sahib Ələkbərov bunu Milli Məclisin Əmək və sosial siyasət komitəsi ilə İqtisadi siyasət, sənaye və sahibkarlıq komitəsinin birgə iclasında, "Dövlət Sosial Müdafiə Fondunun 2027-ci il büdcəsi haqqında" qanun layihəsinin müzakirəsi zamanı deyib. Ələkbərovun sözlərinə görə, baza ssenarisi çərçivəsində neftin hər barelinin dəyəri 65 ABŞ dolları həcmində nəzərdə tutulub. Bu yanaşma makroiqtisadi sabitliyin təmin olunmasına və dövlət büdcəsinin beynəlxalq bazarlardakı qiymət dəyişkənliklərinin mənfi təsirindən qorunmasına yönəlib.

Nazir müavini dövlət başçısının göstərişlərinə uyğun olaraq sahibkarlığın stimullaşdırılması, investisiya iqliminin təkmilləşdirilməsi, sənaye infrastrukturunun inkişaf etdirilməsi və ixracın həvəsləndirilməsi sahələrində müxtəlif tədbirlər görüldüyünü qeyd edib. Sahibkarların fəaliyyətinin dəstəklənməsi məqsədilə kredit faizlərinin subsidiyalaşdırılması və ixrac məsrəflərinin kompensasiya edilməsi üzrə yeni mexanizmlər işə salınıb.