Özbəkistan 2030-cu ilə kimi kritik minerallar istehsalını 2,7 milyard dollara çatdırmağı planlayır

Özbəkistan 2030-cu ilə qədər 16 növ kritik mineral xammalının istehsal həcmini 2,7 milyard dollardan çox çatdırmağı planlaşdırır. Prezident Şavkat Mirziyoyev bu planları Özbəkistan Texnoloji Metallar Kombinatının layihələrinin təqdimatında nəzərdən keçirib. Müəssisə 2026-cı ilin sonuna qədər 12 investisiya layihəsini işə salmağı və yüksək təmizlikli selen və tellur istehsalını genişləndirməyi planlaşdırır. Prezident həmçinin nikel, kobalt, qrafit, surmə, platin və mis daxil olmaqla 11 məhsulun istehsalını mənimsəməyi tapşırıb.

Volfram üzrə dərin emal ayrıca diqqət mərkəzindədir: bu sahəyə 1,1 milyard dollar investisiya cəlb olunması və 2030-cu ilə qədər istehsalın demək olar ki, 2,2 milyard dollara çatdırılması nəzərdə tutulur. Navoiyuran müəssisəsində isə 2030-cu ilə qədər uran istehsalının 7,5 min tondan 15 min tona qədər iki dəfə artırılması, kəşf edilmiş ehtiyatların isə 200 min tona çatdırılması planlaşdırılır. Cari il üçün geoloji kəşfiyyatın genişləndirilməsi və 250 yeni iş yeri nəzərdə tutulub.

Prezident həmçinin uran istehsalında alternativ texnologiyaların tətbiqini tapşırıb. Sulfat turşusunu əvəz edən reagentların payının 2030-cu ilə qədər 40 faizə çatdırılması planlaşdırılır. Daha əvvəl Avrasiya İnkişaf Bankı və Özbəkistan Texnoloji Metallar Kombinatı kritik mineralların çıxarılması və emalı sahəsində əməkdaşlıq memorandumu imzalamışdı.