Qırğızıstanda seçkilər üçün İctimai Müşahidə Mərkəzi yaradılır

Qırğızıstanda Mərkəzi Seçki və Referendum Komissiyası İctimai Müşahidə Mərkəzinin fəaliyyətinin təşkili qaydasını təsdiq edib. Bişkekdən “Kabar” agentliyinin 16.10.26 tarixli xəbərinə görə, qərar bu gün qəbul olunub. Komissiyanın məlumatına əsasən, mərkəzin əsas məqsədi Qırğızıstanda keçiriləcək seçki və referendumların səsvermə günü seçki məntəqələrindən gələn video yayımlarına real vaxt rejimində baxmaq üçün şərait yaratmaqdır.

Mərkəz seçki prosesinin şəffaflığını təmin etmək və seçki məntəqələrindən video izləmək imkanı vermək məqsədilə səsvermə günü Mərkəzi Seçki Komissiyası tərəfindən təşkil olunacaq. Müəyyən edilmiş tələblərə riayət edən vətəndaşlar, kütləvi informasiya vasitələrinin nümayəndələri, beynəlxalq və digər müşahidəçilər, eləcə də digər maraqlı şəxslər mərkəzə sərbəst daxil ola biləcəklər. Mərkəzdə qeydiyyat, müvəqqəti nişanların verilməsi və video izləmə qaydaları nəzərdə tutulub.

Mərkəzə gələnlərin təbliğat aparması, avadanlığın işinə müdaxilə etməsi və ictimai asayişi pozması qadağandır. Videoların təbliğat məqsədilə istifadəsi və seçicinin iradəsinin məzmununu müəyyən etməyə yönəlmiş cəhdlərə də yol verilməyəcək.