Rəşt-Astara dəmiryolunun tikintisinə hazırlıq işləri davam edir – İranlı vali

İranın Gilan vilayətinin valisi Hadi Haqşenas Trend-ə açıqlamasında bildirib ki, Şimal-Cənub Beynəlxalq Dəhlizi çərçivəsində Rəşt-Astara dəmiryolunun tikintisi üzrə əməliyyat işləri davam etdirilir. Onun sözlərinə görə, 162 kilometr uzunluğunda olan xəttin keçdiyi ərazinin təxminən 120 kilometrinin mülkiyyəti vətəndaşlardan satın alınıb.

Vali əlavə edib ki, 42 kilometrin mülkiyyətinin satın alınması üzrə işlər davam etdirilir və sahibkarlara ödənişlər edildiyi halda, həmin ərazilərin də mülkiyyətinin satın alınması başa çatdırılacaq. Onun qeyd etdiyinə görə, xəttin keçəcəyi istiqamətdə 60 kilometrdə dəmiryolu yatağının möhkəmləndirilməsi əməliyyatı həyata keçirilib. Dəmiryolu xəttinin inşasına ya xarici, ya da yerli podratçı şirkət tərəfindən start veriləcəyi gözlənilir.

Şimal-Cənub dəhlizinin təməli 12 sentyabr 2000-ci ildə Rusiya, İran və Hindistan arasında imzalanmış hökumətlərarası Saziş əsasında qoyulub. Qəzvin – Rəşt (175 km) dəmiryolu 6 mart 2019-cu ildə istifadəyə verilib. 17 may 2023-cü ildə Rusiya və İran arasında Rəşt-Astara dəmiryolunun tikintisinə dair saziş imzalanıb. Xəttdə 9 stansiya tikiləcək və Sazişə əsasən Rusiya tərəfinin 1,6 milyard avro xərcləməsi gözlənilir. Tikintinin 48 ay ərzində başa çatdırılması nəzərdə tutulub.