DMM-dən Şərqi Aralıq dənizi və Liviya memorandumu ilə bağlı dezinformasiya xəbərdarlığı

Dezinformasiyaya Qarşı Mübarizə Mərkəzi (DMM) Türkiyənin Şərqi Aralıq dənizində qanuni haqlarını qorumaq əzmində olduğunu bildirib, Liviya ilə imzalanmış dəniz yetki sahələri sazişini təhrif edən əsassız paylaşımlara inanılmamasını çağırıb.

DMM-in sosial media hesabında edilən açıqlamada, Türkiyənin Şərqi Aralıq dənizini qeyri-sabitləşdirdiyini iddia edən paylaşımların ictimaiyyəti manipulyasiya etməyə yönəlmiş açıq dezinformasiya olduğu vurğulanıb. Açıqlamaya görə, iki suveren dövlətin qanuni haqlarını qorumaq məqsədilə imzaladığı saziş tərəf ölkələrin təsdiq proseslərindən keçib və beynəlxalq hüquqa və ədalət prinsiplərinə tam uyğun olaraq qüvvəyə minib.

Açıqlamada, tərəfi olmadığı dəniz yetki sahələrində hüquqsuz addımlar atan qüvvələrin Türkiyəni hədəfə almasının öz pozuntularını örtmək cəhdi olduğu bildirilib. Türkiyənin Şərqi Aralıq dənizində də sülhdən, sabitlikdən və ədalətdən tərəfdar olmağa davam etdiyi qeyd edilib.