Azərbaycan və Xlinks “Yaşıl Enerji Dəhlizi” üzrə əməkdaşlığı müzakirə edib

Azərbaycan və Böyük Britaniyanın “Xlinks” şirkəti “Xəzər-Qara dəniz-Avropa Yaşıl Enerji Dəhlizi”nin inkişafında şirkətin mümkün iştirakını müzakirə edib. Fikir mübadiləsində layihənin texniki və kommersiya həlləri, maliyyələşdirmə və idarəetmə modeli nəzərdən keçirilib. Report Energetika Nazirliyinə istinadən xəbər verir.

Müzakirələr Bakıda energetika naziri Pərviz Şahbazov ilə şirkətin baş icraçı direktoru Ceyms Hamfri arasındakı görüşdə aparılıb. Şahbazov elektrikləşmənin sürətləndiyi dövrdə ölkələrarası enerji bağlantılarının enerji təhlükəsizliyi, ekoloji dayanıqlılıq və iqtisadi rifah baxımından əhəmiyyətini vurğulayıb. Nazir Cənub Qaz Dəhlizi təcrübəsinin belə layihələrin xalqları birləşdirdiyini göstərdiyini bildirib.

Hamfri şirkətin layihənin inkişafına dəstək göstərmək, birgə investisiya qoymaq və inkişaf mərhələsində öz vəsaiti ilə iştirak etmək marağını ifadə edib. “Xlinks”in sualtı kabel və yüksək gərginlikli sabit cərəyan sistemləri üzrə təcrübəsi barədə məlumat verilib. Kapital xərclərinin optimallaşdırılması, icra müddətlərinin qısaldılması və rəqabətqabiliyyətliliyin artırılmasına dair təkliflər təqdim olunub. Hibrid modelin maliyyələşdirmə imkanları və Avropa İttifaqının tənzimləyici çərçivəsi ilə uyğunluğu nəzərdən keçirilib.