Kürşad Zorlu: Ankara Sammiti Türk dünyasının strateji məqsədlərini birləşdirəcək

Türkiyənin Ədalət və İnkişaf Partiyasının (AK Parti) Türk Dövlətləri ilə Əlaqələr Komitəsinin sədri, deputat Kürşad Zorlu bildirib ki, Ankarada keçiriləcək sammit Türk dünyasının strateji məqsədlərini birləşdirəcək və ortaq gələcək üçün yol xəritəsi müəyyən edəcək. Zorlu 29-30 oktyabr tarixlərində Ankarada keçiriləcək Türk Dövlətləri Təşkilatının (TDT) 13-cü Sammiti ilə bağlı mətbuat konfransında danışıb.

Zorlu bildirib ki, 29 oktyabrda TDT Xarici İşlər Nazirləri Şurasının iclası keçiriləcək, 30 oktyabrda isə Türkiyə Prezidenti Rəcəb Tayyip Ərdoğanın ev sahibliyi ilə Dövlət Başçıları Sammiti olacaq. Deputat Türk dövlətlərinin birləşmiş ümumi milli gəliri 2025-ci ildə təxminən 2,5 trilyon dollara çatdığını, Türkiyənin TDT üzv və müşahidəçi ölkələri ilə ticarət dövriyyəsinin isə 26,9 milyard dollar təşkil etdiyini söyləyib.

O, iqtisadi inteqrasiya üçün Orta Dəhlizin strateji əhəmiyyətini vurğulayaraq, bu marşrutla daşınan yük həcminin 2022-ci ildə 1,7 milyon tondan 2025-ci ildə 4,1 milyon tona yüksəldiyini deyib. Sammitdə ortaq muzey kartı, hava limanlarında Türk dövlətləri vətəndaşları üçün ortaq xidmət məntəqələri, futbol sahəsində əməkdaşlığın genişləndirilməsi və ortaq e-ticarət platformasının yaradılması məsələlərinin müzakirə olunacağı bildirilib.