Ermənistan naziri: TRIPP layihəsi sülh sazişi imzalanmadan reallaşa bilər

Ermənistanın xarici işlər naziri Ararat Mirzoyan Ermənistanla Azərbaycan arasında sülh sazişi imzalanmadan TRIPP layihəsinin həyata keçirilməsinə başlanıla biləcəyini istisna etməyib. Modern.az xəbər verir ki, nazir parlamentdəki çıxışı zamanı bu suala müsbət cavab verib: “Bu suala rahatlıqla cavab verə bilərəm: bəli, mümkündür”.

Mirzoyan xatırladıb ki, sülh sazişinin mətni artıq paraflanıb və hər iki ölkə sənədin məzmununu şübhə altına almadığını rəsmən bəyan edir. Onun sözlərinə görə, Bakı sənədi başqa səbəbə görə imzalamaqdan imtina edir: söhbət Ermənistan Konstitusiyasına dəyişiklik edilməsi tələbindən gedir.

A.Mirzoyan saziş hələ imzalanmasa da, praktik olaraq real sülhün formalaşdığını bildirib: “Deməli, TRIPP layihəsinin işə salınması üçün sülh lazımdır və həmin sülh artıq mövcuddur”. O, əvvəlcə sülh sazişinin imzalanması, sonra isə birgə layihələrin başlanmasının məntiqli olacağını etiraf etsə də, hadisələrin praktikada həmişə bu sxem üzrə getmədiyini qeyd edib. Nazir TRIPP və digər birgə təşəbbüslərin də sülh sazişinin imzalanmasına töhfə verə biləcəyini istisna etməyib.