Yakutiyada 50-dən çox qazanxana iki il ərzində qaza keçiriləcək

Rusiyanın Yakutiya Respublikasının 17 yaşayış məntəqəsində 50-dən çox qazanxananın iki il ərzində qaz yanacağına keçirilməsi planlaşdırılır. Mənzil-kommunal təsərrüfatı və energetika naziri Vyaçeslav Yemelyanov bunu TASS Uzaq Şərq mərkəzində keçirilən mətbuat konfransında bildirib.

"Yaşayış məntəqələrinin qazlaşdırılması çərçivəsində biz, ilk növbədə, daş kömür və xüsusilə neft kimi baha yanacaqla işləyən səmərəsiz qazanxanalardan imtina etməyi planlaşdırırıq", - deyə Yemelyanov vurğulayıb. Bu, kommunal xidmətlərin etibarlılığını artıracaq və dövlət büdcəsinin tariflər arasındakı fərqin subsidiyalaşdırılmasına xərclərini azaldacaq.

"Qazprom" ilə birgə Cənubi Yakutiyada daş kömür və neftlə işləyən qazanxanaların qaza keçirilməsi üzrə geniş proqram başlanıb. 2030-cu ilə qədər Olyokminsk, Lensk, Nerüngri və Aldan rayonlarında 67 qazanxanının qaza keçirilməsi planlaşdırılır. 2026-cı il üzrə sosial qazlaşdırma planı müddətindən əvvəl yerinə yetirilib, ilin əvvəlindən isə "Sahatransneftegaz" şirkəti şəbəkə qazına 1500 ev qoşub.