Azərbaycan Mərkəzi Bankı uçot dərəcəsini 6,5 faiz səviyyəsində saxlayıb

Azərbaycan Mərkəzi Bankının (AMB) İdarə Heyəti uçot dərəcəsinin 6,5 faiz səviyyəsində saxlanılması barədə qərar qəbul edib. Report bu barədə AMB-yə istinadən xəbər verir. Məlumata görə, faiz dəhlizinin aşağı həddi 5 faiz, yuxarı həddi isə 7,5 faiz səviyyəsində saxlanılıb.

Qərar qəbul olunarkən ümumi və baza inflyasiya göstəricilərinin, inflyasiya gözləntilərinin və risklər balansının dinamikası nəzərə alınıb. Eyni zamanda valyuta bazarında gedən proseslər, bank sektorunun likvidlik mövqeyinin dəyişimi və qlobal monetar şəraitdə müşahidə olunan son meyillər qiymətləndirilib, AMB bəyan edib.

Faiz dəhlizinin parametrləri ilə bağlı növbəti qərar barədə məlumat dekabrın 23-də ictimaiyyətə açıqlanacaq.