Dünya Bankı Özbəkistana elektrik şəbəkələrinin modernləşdirilməsi üçün 100 milyon dollar ayıracaq

Dünya Bankı Özbəkistana ölkənin elektrik paylanma sisteminin səmərəliliyini və etibarlılığını artırmaq məqsədilə 100 milyon dollarlıq güzəştli kredit ayıracaq.

Proqram çərçivəsində ölkə üzrə 60 əsas yarımstansiya yenilənəcək və rəqəmsallaşdırılacaq. Layihənin, modernləşdirilmiş infrastrukturun istismara verilməsindən sonra beş il ərzində təxminən 11.700 əlavə iş yeri yaratması gözlənilir.

2031-ci ilə qədər modernləşdirilmiş yarımstansiyalar sayəsində illik elektrik itkilərinin 20 min MVt·saat azalacağı və şəbəkəyə ən azı 3,3 QVt bərpa olunan enerji gücünün inteqrasiya edilməsi gözlənilir. Layihə həmçinin ildə təxminən 23 min ton karbon qazına bərabər istixana qazı emissiyasının qarşısının alınmasına kömək edəcək.