Azərbaycanda maaş hesabını istənilən banka keçirmək gələn ilin aprelindən mümkün olacaq

Azərbaycanda vətəndaşlar gələn ilin 1 aprelindən etibarən maaş hesablarını heç bir əlavə ödəniş etmədən istədikləri banka keçirə biləcəklər. Modern.az-ın xəbərinə görə, bu barədə Mərkəzi Bankın sədri Taleh Kazımov iqtisadçılarla görüşündə məlumat verib.

Onun sözlərinə görə, növbəti mərhələdə pensiyaçılar da təqaüd aldıqları bankı seçə biləcəklər. Bu yeniliyin banklar arasında müştəri cəlbi uğrunda rəqabəti artıracağı və hesabını başqa banka keçirənlər üçün daha əlverişli təkliflərin yaranacağı gözlənilir.

İqtisadçılar bildirir ki, maaş hesablarının ödənişsiz daşınması bu il tətbiq edilməli idi, lakin proses gecikib.