Qazaxıstanda yeni dövlət mükafatları təsis edilir

Qazaxıstan Parlamenti (Qurultay) deputatların təşəbbüsü ilə hazırlanmış, Qazaxıstan Respublikasının Dövlət Mükafatları haqqında Qanununa dəyişiklik və əlavələr edilməsinə dair qanun layihəsini qəbul edib. Egemen Qazaqstan, Egemen.kz-ə istinadən xəbər verir ki, layihə ikinci oxunuşda təsdiq, üçüncü oxunuşda isə qəbul olunub.

Dəyişikliklər Dövlət başçısının Qurultayın birinci çağırışının birinci sessiyasının açılışında mədəniyyət və incəsənət sahəsində dövlət mükafatları ilə bağlı qanunvericiliyin təkmilləşdirilməsi barədə verdiyi tapşırığın yerinə yetirilməsi məqsədilə hazırlanıb.

Qanunda yerli musiqi sənətinin və mahnı yaradıcılığının inkişafında bəhrəli fəaliyyətinə və xüsusi əməyinə görə vətəndaşların təltif olunması üçün “Şəmşi Qaldayaqov” medalının təsis edilməsi nəzərdə tutulub. Həmçinin təsviri sənətdə görkəmli əsərləri ilə seçilən və milli bədii mədəniyyətin inkişafına xüsusi əmək sərf etmiş xadimlər üçün “Qazaxıstanın əməkdar rəssamı” fəxri adı tətbiq olunur.

Dövlət başçısı dövlət mükafatları sırasına “Xoca Əhməd Yəsəvi” ordenini daxil etmək barədə fərman imzalayacağını bildirib.