Ərdoğan: Qara dənizdə hücumlar qəbuledilməzdir

Türkiyə Prezidenti Rəcəb Tayyib Ərdoğan işçi səfəri çərçivəsində İstanbula gələn Ukrayna Prezidenti Volodimir Zelenski ilə Dolmabaxça İş Ofisində təkbətək görüş keçirib. Zelenski rəsmi mərasimlə qarşılanıb, görüşdən sonra isə birgə mətbuat konfransı təşkil olunub.

Ərdoğan Qara dənizdə gəmiçilik təhlükəsizliyini yenidən təmin etmək üçün tərəflərlə danışıqların davam etdiriləcəyini bildirib. Hücumların kim tərəfindən və hansı səbəbdən törədilməsindən asılı olmayaraq, onları heç bir halda qəbul edə bilməyəcəklərini vurğulayıb. Müharibədə həlak olanlarla bağlı Zelenskiyə və Ukrayna xalqına başsağlığı verib.

O, ABŞ Prezidenti Donald Trampın səyləri ilə müharibənin diplomatik yollarla başa çatdırılmasına yönəlmiş təşəbbüslərin sürətləndiyindən məmnunluq duyduqlarını deyib. Ədalətli sülhün heç kimin məğlubiyyəti olmayacağını vurğulayan Ərdoğan, Ukraynanı tərk etməyən şirkətlərin ölkənin bərpasına mühüm töhfələr verəcəyini söyləyib və səfərə görə Zelenskiyə təşəkkür edib.