Қазақстан 2029 жылға дейін 13,3 ГВт жаңа қуат енгізуді жоспарлап отыр

Қазақстан 2029 жылдың соңына дейін 13,3 ГВт жаңа энергетикалық қуат енгізуді жоспарлап отыр. Бұл елдің ішкі электр энергиясына деген сұранысын толық қамтамасыз етіп, генерациялық қуаттың 20%-дық профицитін қалыптастыруға мүмкіндік береді. Бұл туралы Қазақстан Республикасы Премьер-Министрінің бірінші орынбасары Нұрлыбек Налибаев Үкіметтің нақты сектор экономикасын дамыту мәселелері бойынша баспасөз конференциясында, Президенттің Жолдауында берілген тапсырмаларға сәйкес мәлімдеді.

Қазіргі уақытта Қазақстанның біріктірілген энергетикалық жүйесіне 254 энергия көзі кіреді, оның 172-сі жаңартылатын энергия көздері. Жүйенің қолжетімді қуаты 17 ГВт. 2026 жылдың он айында электр энергиясын өндіру 102 млрд кВт·сағаттан асты, ал тұтыну 103 млрд кВт·сағаттан жоғары болды. Шырқау сағаттарда манёвр қуаттарының тапшылығы 800 МВт-тан 2 ГВт-қа дейін жетеді және ол көрші елдердің энергетикалық жүйелерімен параллель жұмыс арқылы жабылады.

Жоспарға сай 2026 жылы 1,27 ГВт, 2027 жылы 2,5 ГВт жаңа қуат іске қосылады, оның ішінде 574 МВт жаңартылатын энергия көздерінен. 2029 жылға дейін жоспарланған 13,3 ГВт-тың 7,4 ГВт-ы базалық генерацияға, оның ішінде 4,3 ГВт газ генерациясына, ал 5,9 ГВт жаңартылатын энергия көздеріне тиесілі болады. Халықаралық институттардың қолдауымен 2035 жылға дейінгі энергетикалық баланс та жаңартылады.