Жәрдемақылар мұқтаждық деңгейіне қарай беріледі

Еңбек және халықты әлеуметтік қорғау министрі Асқарбек Ертаев мемлекеттік қолдау, ең алдымен, өз еркімен қажеттілігін қамтамасыз ете алмайтын адамдарға көрсетілуі керек екенін айтты. Ол Орталық коммуникациялар қызметі алаңында жәрдемақы тағайындауда отбасының нақты мұқтаждық деңгейі бағаланатынын мәлімдеді.

Реформаға негіз болған Әлеуметтік әл-ауқат деңгейін айқындау әдістемесі 30 қыркүйекте бекітілді және 2027 жылдың 1 қаңтарында күшіне енеді. Әдістеме екі компоненттен тұрады: алты бағыт бойынша 59 көрсеткішті қамтитын материалдық әл-ауқат және отбасының құрамы, балалар, қарт адамдар мен мүгедектігі бар адамдардың болуын ескеретін әлеуметтік тұрақтылық. Мәліметтер мемлекеттік базадан алынады, азаматтардан қосымша анықтама талап етілмейді.

Министрдің айтуынша, республикалық бюджет қаржыландыратын 36 жәрдемақының тек 14 түріне мұқтаждық критерийі енгізіледі. Ядролық сынақтар мен саяси репрессиядан зардап шеккендерге арналған төлемдер сақталады. Отбасының әл-ауқат деңгейіне қарамастан, мүгедектігі бар балаларға, I және II топтағы мүгедектерге, жетімдерге және көпбалалы аналарға арналған кепілдіктер сақталады.