Әлеуметтік көмек берудің тәртібі өзгереді

Премьер-министр Олжас Бектенов еңбек және халықты әлеуметтік қорғау саласын цифрлық трансформациялау мәселелері жөнінде кеңес өткізді. Жиында мемлекеттік әлеуметтік көмекті нақты мұқтаж азаматтарға бағыттау, еңбек құқықтарының сақталуын бақылау және кәсіпорындардағы тәуекелдерді ерте анықтау үшін цифрлық шешімдер қаралды.

Еңбек және халықты әлеуметтік қорғау министрі Асқарбек Ертаев пен вице-министр Бахтияр Жазықпаев негізгі цифрлық шешімдерді таныстырды. «Отбасының цифрлық картасы» ақпараттық жүйесінде 30-дан астам мемлекеттік ақпараттық жүйеден алынған 20 млн-нан астам азамат пен 6,2 млн үй шаруашылығы туралы мәлімет біріктірілген. 2025 жылы 480 355 мұқтаж отбасының өмір сүру жағдайы жақсарып, олар әл-ауқаты жоғары санатқа ауыстырылған; 2026 жылдың басынан бері тағы 464 158 отбасы осы санатқа өткен.

Әл-ауқаты жоғары санатқа енгізілген азаматтарға қатысты өзгерістер әлеуметтік жәрдемақылардың барлық 36 түрінің тек 14-іне қатысты болмақ. Қалған 22 төлем түрі бойынша қолданыстағы тәртіп өзгеріссіз сақталады. Үкімет нақты мұқтаж азаматтарға мемлекеттік қолдаудың қазіргі тәртібі толық көлемде сақталатынын мәлімдеді.