Наманган облысында 105 млн долларлық логистикалық орталықтың іргетасы қаланды

Өзбекстанның Наманган облысы Папа ауданында құны 105 млн доллар болатын «А» санатты логистикалық орталықтың іргетасы қаланды. Бұл туралы облыс хокимиятының ақпараттық қызметі хабарлады.

Жобаны «Ипак дарвозаси» халықаралық логистикалық орталығы жүзеге асырады. Оны шетелдік бірлескен кәсіпорын Ресей мен Оман серіктестерінің қатысуымен іске асырады. Орталық 35 гектар жерде орналасып, жылдық өткізу қабілеті 18 250 жүк көлігін құрайды. Жоба аясында 300 жаңа жұмыс орны ашылып, жыл сайынғы бюджетке түсетін түсім 100 млрд сумнан асады деп жоспарланып отыр.

Объектіні 2027 жылдың IV тоқсанында пайдалануға беру жоспарланған. Рәсімге Наманган облысының хокимі Шавкатжон Абдураззақов, шетелдік серіктестер, ақсақалдар, құрылысшылар және қоғамдастық қатысты. Хоким мұндай ірі жобалардың өңір экономикасын дамытудағы рөлі туралы айтты. Орталық халықаралық стандарттар бойынша салынуда.