Energetika sohasida investorlar kengashi tuziladi, boshchisi Saida Mirziyoyeva

Oʻzbekistonda yoqilgʻi-energetika sohasida investorlar kengashi tashkil etiladi. Bu haqda Shavkat Mirziyoyev yoqilgʻi-energetika sohasidagi investorlar bilan oʻtkazilayotgan ochiq muloqotda maʼlum qildi. Kengashga Prezident administratsiyasi rahbari Saida Mirziyoyeva boshchilik qiladi.

Davlat rahbarining taʼkidlashicha, energetika loyihalari katta sarmoya va murakkab infratuzilmani talab qiladi. Yer ajratish, elektr tarmoqlariga ulanish yoki texnik shartlarni olishdagi kechikishlar loyihalarga taʼsir qiladi. ACWA, Vision Invest, DataVolt, Voltalia va EDF kompaniyalari bunday masalalarni doimiy muloqot orqali hal qilishni taklif etgan. Kengash yer ajratishdan energetika obyektlarini ishga tushirishgacha boʻlgan jarayonda investorlar duch keladigan masalalarga tezkor yechim topadi.

Muloqotda energetika sohasi uchun malakali kadrlar tayyorlash ham koʻrib chiqildi. ACWA Qoraqalpogʻiston, Buxoro va Sirdaryodagi texnikumlarni jihozlab, har yili yuzlab yoshlarni oʻqitishni boshlamoqda. Kelasi oʻquv yilidan energetika yoʻnalishlari boʻyicha oliy taʼlim muassasalariga qabul kvotalari oshiriladi, har yili 50 nafar yoshga dunyoning yetakchi universitetlarida tahsil olish uchun davlat granti ajratiladi. Prezident 2027-yilda suyultirilgan gaz yetkazib berish sohasini respublika boʻylab xususiy sektorga berish maqsad qilinganini hamda hozir 3,8 million xonadon undan foydalanayotganini bildirdi.