Eng arzon energiya – tejalgan energiya – prezident

Prezident Shavkat Mirziyoyev yoqilgʻi-energetika tarmogʻidagi investorlar bilan ochiq muloqotda endi har bir hududda qanday quvvat zarurligi oldindan rejalashtirilib, tayyor loyihalar ochiq tanlovga chiqarilishini maʼlum qildi. U oʻtgan yillarda energetika loyihalarini tayyorlash va investorlar bilan ishlashda katta tajriba toʻplanganini qayd etdi.

Maqsad 2030-yilgacha 22 ming megavatt yangi quvvat yaratish. Natijada elektr energiyasi ishlab chiqarishning yillik hajmi 129 milliard kilovatt-soatdan oshadi, qayta tiklanuvchi energiya ulushi esa 54 foizga yetadi. Loyihalar ochiq raqobat, shaffof qoidalar va kelishilgan shartlarning izchil bajarilishi asosida amalga oshiriladi. Ilk bosqichda «yashil» quvvatlar koʻpincha investorlar taklif qilgan hududlarda joylashtirilgani, bu esa elektrni boshqa hududlarga yetkazish xarajatlarini oshirgani qayd etildi.

«Bizga alohida-alohida elektr stansiyalari emas, uzviy bogʻlangan energetika tizimi kerak», – dedi prezident. Umumiy quvvati 2 ming 200 megavatt boʻlgan 6 ta quyosh va shamol stansiyasi loyihasi ochiq tanlovga chiqarilmoqda. 2050-yilgacha boʻlgan energetika sohasining Milliy bosh rejasi birinchi marta ishlab chiqilib, ochiq eʼlon qilinadi.