Shavkat Mirziyoyev AQSH kompaniyalari rahbarlari bilan uchrashdi

Prezident Shavkat Mirziyoyev 19-oktabr kuni Samarqand shahrida “Franklin Templeton” (AQSH) kompaniyasi prezidenti va bosh ijrochi direktori Jenni Jonsonni qabul qildi. Uchrashuvda yirik davlat korxonalarini transformatsiya qilish boʻyicha dastlabki natijalar koʻrib chiqildi.

London va Toshkent birjalarida Oʻzbekiston Milliy investitsiya jamgʻarmasi aksiyalarining joylashtirilishi mamlakat tarixidagi ilk xalqaro IPO boʻldi. Natijada qariyb 700 million dollar mablagʻ jalb etildi, talab taklifdan toʻrt baravardan ziyod oshdi. Keyingi bosqichda portfeldagi kompaniyalarni transformatsiya qilish orqali aholi farovonligi hamda xizmatlar ishonchliligi va sifatini oshirish koʻzda tutilgan.

Shuningdek, prezident “Wabtec” (AQSH) kompaniyasi direktorlar kengashi raisi va bosh ijrochi direktori Rafael Santanani qabul qildi. Uchrashuvda lokomotivlar parkini yangilash va kengaytirish, uzoq muddatli servis bilan yetkazib berish, texnik xizmat va butlovchi qismlar ishlab chiqarish hamda togʻ-kon korxonalari uchun servis markazi masalalari koʻrib chiqildi.