Şavkat Mirziyoyev ABŞ-ın aparıcı şirkətlərinin rəhbərləri ilə görüşüb

Prezident Şavkat Mirziyoyev oktyabrın 19-da Səmərqənd şəhərində “Franklin Templeton” (ABŞ) şirkətinin prezidenti və baş icraçı direktoru Cenni Consonu qəbul edib. Görüşdə iri dövlət müəssisələrinin transformasiyası üzrə ilkin nəticələr müzakirə olunub.

London və Daşkənd birjalarında Özbəkistan Milli İnvestisiya Fondunun səhmlərinin yerləşdirilməsi ölkənin tarixində ilk beynəlxalq IPO kimi qeyd edilib. Nəticədə təxminən 700 milyon dollar vəsait cəlb olunub, tələb təklifi dörd dəfədən çox üstələyib. Növbəti mərhələdə fondun portfelindəki şirkətlərin transformasiyası ilə əhalinin rifahının və xidmətlərin keyfiyyətinin artırılması nəzərdə tutulur.

Prezident eyni zamanda ABŞ-ın “Wabtec” şirkətinin direktorlar şurasının sədri və baş icraçı direktoru Rafael Santananı qəbul edib. Görüşdə lokomotiv parkının yenilənməsi və genişləndirilməsi, uzunmüddətli servislə lokomotivlərin tədarükü, yerli texniki xidmət və ehtiyat hissələri istehsalı, habelə mədən şirkətləri üçün karyer texnikası servis mərkəzi və dizel-generator qurğuları ilə bağlı əməkdaşlıq məsələləri müzakirə olunub.