Shavkat Mirziyoyev AQSH davlat kotibini qabul qildi

Davlat rahbari Shavkat Mirziyoyev 19-oktyabr kuni AQSH davlat kotibi Marko Rubioni qabul qildi. Rubio C5+1 formatidagi vazirlar uchrashuvi hamda Amerika—Oʻzbekiston ishbilarmonlik va investitsiya kengashining ikkinchi yigʻilishida ishtirok etish uchun mamlakatga kelgan edi. Uchrashuv boshida u AQSH prezidenti Donald Trampning samimiy salomi va eng ezgu tilaklarini yetkazdi.

Asosiy eʼtibor Oʻzbekiston—AQSH strategik sherikligini yanada mustahkamlash va oliy darajada erishilgan kelishuvlarni izchil amalga oshirishga qaratildi. C5+1 vazirlar uchrashuvi yakunlari yuqori baholandi. Siyosat va xavfsizlik, savdo va investitsiyalar, innovatsiya va texnologiyalar, taʼlim va madaniyat sohalarida ikki tomonlama hamkorlik faollashgani qayd etildi.

Xavfsizlik sohasida terrorizm, ekstremizm, narkotik moddalarning noqonuniy aylanmasi va noqonuniy migratsiyaga qarshi kurash mustahkamlanmoqda. Yil boshidan buyon oʻzaro tovar ayirboshlash hajmi 35 foizga oshdi. Ishbilarmonlik va investitsiya kengashining bugungi yigʻilishida 12 milliard dollarlik yangi kelishuvlarga erishildi. Koinotni tinch maqsadlarda oʻzlashtirish boʻyicha “Artemida” bitimlari ham imzolandi.