Turkiya va Ozarbayjon birligi sarsilmasdir: Devlet Bahçeli

Turkiyaning Millatchi harakat partiyasi (MHP) rahbari Devlet Bahçeli turkiy davlatlar oʻrtasidagi munosabatlar tashqaridan shakllantiriladigan siyosiy loyihalar, geosiyosiy hisob-kitoblar va ajratuvchi rejalarga sigʻmaydigan darajada chuqur tarixiy ildizga ega ekanini aytdi. Partiya Boshqaruv kengashi yigʻilishidan soʻng tarqatilgan yozma bayonotida u turkiy dunyo kelajagi mustaqil davlatlar suverenitetiga, oʻzaro hurmatga, teng huquqli hamkorlikka va ishonchga asoslanishini taʼkidladi.

Bahçeli kelasi hafta Anqarada boʻlib oʻtadigan Turkiy davlatlar tashkilotining sammitiga eʼtibor qaratdi va uni tarixiy masʼuliyatning muhim namoyishi deb atadi. U Ozarbayjon prezidenti Ilhom Aliyevning Anqaradagi sammitga taklif etilishi Turkiya–Ozarbayjon munosabatlarining tarixiy va strategik ahamiyatini saqlash nuqtai nazaridan alohida muhim ekanini qayd etdi.

Bayonotda Turkiya va Ozarbayjon oʻrtasidagi aloqalar umumiy tarix, til, madaniyat, oʻzaro ishonch va xalqlarning maʼnaviy birligiga asoslangani taʼkidlandi. Shu bilan birga, tafovutli yondashuvlar va hal etilishi kutilayotgan masalalar paydo boʻlishi mumkinligi, asosiy vazifa esa ularni birodarlik munosabatlariga zarar yetkazmasdan, oʻzaro tushunish va toʻgʻridan-toʻgʻri muloqot orqali hal qilish ekani bildirildi.