Türkiyə ilə Azərbaycanın birliyi sarsılmazdır: Dövlət Bağçalı

Türkiyənin Milliyyətçi Hərəkat Partiyasının (MHP) sədri Dövlət Bağçalı bildirib ki, türk dövlətləri arasındakı münasibətlər kənardan formalaşdırılacaq siyasi layihələrə, geosiyasi hesablamalara və ayırıcı planlara sığmayacaq qədər dərin tarixi köklərə malikdir. Partiyanın İdarə Heyətinin iclasından sonra yaydığı yazılı açıqlamada o, türk dünyasının gələcəyinin müstəqil dövlətlərin suverenliyinə, qarşılıqlı hörmətə, bərabərhüquqlu tərəfdaşlığa və etimada əsaslandığını vurğulayıb.

Bağçalı gələn həftə Ankarada keçiriləcək Türk Dövlətləri Təşkilatının Zirvə toplantısına işarə edib və bunu tarixi məsuliyyətin mühüm təzahürü adlandırıb. O, Azərbaycan Prezidenti İlham Əliyevin Ankaradakı Zirvə toplantısına dəvət edilməsinin Türkiyə-Azərbaycan münasibətlərinin tarixi və strateji əhəmiyyətinin qorunması baxımından xüsusi önəm daşıdığını qeyd edib.

Açıqlamada iki ölkə arasındakı bağların ortaq tarix, dil, mədəniyyət, qarşılıqlı etimad və xalqların mənəvi birliyi üzərində qurulduğu vurğulanıb. Eyni zamanda, fərqli yanaşmaların və həllini gözləyən məsələlərin ortaya çıxa biləcəyi, əsas məsələnin isə bunları qardaşlıq münasibətlərinə xələl gətirmədən qarşılıqlı anlaşma və birbaşa dialoq yolu ilə həll etmək olduğu bildirilib.