Bolalarga nisbatan jinsiy zoʻravonlik uchun jazo qanday kuchaytirildi?

Oʻzbekiston Prezidenti Shavkat Mirziyoyev bolalarga nisbatan zoʻravonlikning barcha shakllari uchun javobgarlikni kuchaytiruvchi qonunni imzoladi. Hujjat 30 sentabrda Oliy Majlis Qonunchilik palatasi tomonidan qabul qilingan, 2 oktabrda Senat maʼqullagan. Oʻzgarishlar bugun, 14 oktabrdan kuchga kirdi.

Asosiy yangiliklardan biri — 14 yoshga toʻlmagan bolaga nisbatan jinsiy zoʻravonlik sodir etgan shaxslarga 15 yildan 25 yilgacha yoki umrbod ozodlikdan mahrum qilish jazosi tayinlanishi mumkin. Avval jazo 15 yildan 20 yilgacha edi. 18 yoshga toʻlmagan shaxslarni nomusiga tegish jinoyati boʻyicha javobgarlikka tortish muddati qoʻllanmaydi. Bola oʻlimiga sabab boʻlgan qasddan sodir etilgan jinoyatlar uchun jazoni yengillashtirish taqiqlandi. Shahvoniy shilqimlik uchun jarima 10-15 BHM yoki 10 sutkagacha maʼmuriy qamoq qilib belgilandi.

Prezident administratsiyasi rahbari Saida Mirziyoyeva bolaga zulm qilgan, unga jismoniy yoki ruhiy azob bergan har bir kimsa — taʼlim muassasasi xodimi boʻlsin yoki yaqin qarindoshi — javobgarlikka tortilishini taʼkidladi. Qonunda zoʻravonlikdan jabrlangan yoki guvohi boʻlgan voyaga yetmaganlar uchun protsessual kafolatlar ham kengaytirilgan.