Rossiya: 2027 yildan banklar omonat foizidan daromad soligʻini avtomat ushlashi mumkin

Rossiya Davlat Dumasi 29 oktabrda omonat daromadlariga soliq solish tartibini oʻzgartiruvchi qonun loyihasini birinchi oʻqishda qabul qildi. Hujjat barcha bosqichlardan oʻtsa, 2027 yildan kredit tashkilotlari foiz toʻlashda jismoniy shaxslarning daromad soligʻini (NDFL) mustaqil hisoblab ushlab qoladi. Hozirda yillik soliqni Federal soliq xizmati (FNS) belgilaydi va fuqarolar xabarnoma olgach toʻlaydi.

Moliya vazirligi rejasiga koʻra, soliq stavkasi daromad manbaiga emas, umumiy daromad hajmiga bogʻliq boʻladi. Omonat foizlari ish haqi va boshqa tushumlarga qoʻshilib, 13% dan 22% gacha besh bosqichli shkala boʻyicha soliqqa tortiladi. Ushlab qolishda banklar soliq solinmaydigan chegarani hisobga oladi va summani yil boshidan boshlab yigʻma tarzda hisoblaydi. Soliqsiz summa oʻtgan yildagi Rossiya Markaziy banki eng yuqori asosiy stavkasi boʻyicha belgilanishi rejalashtirilgan.

Oʻzgarishlar kuchga kirishi uchun qonun loyihasi qolgan oʻqishlardan oʻtishi kerak. Navbatdagi koʻrib chiqish 19 noyabrga belgilangan.