Buxoro viloyatida Tekhnochem neft-kimyo klasteri 292 mln dollarga kengaytiriladi

Buxoro viloyatida Tekhnochem neft-kimyo klasterini kengaytirish uchun 292 million dollar investitsiya kiritish rejalashtirilgan. Bu haqda Prezident Shavkat Mirziyoyevning korxonaga tashrifi chogʻida maʼlum boʻldi. Loyiha yillik qayta ishlash quvvatini 400 ming tonnaga oshirish va 700 ta yangi ish oʻrni yaratishni nazarda tutadi.

Buxoro tumanida joylashgan 69 gektar maydonli majmuada qariyb 500 kishi ishlaydi. Bu turdagi majmua Oʻzbekistonda yagonadir. Majmuada neft, gaz kondensati, nafta, metanol va piroliz distillati qayta ishlanadi. Mahsulotlar orasida benzin sifatini yaxshilash uchun oktan-buster hamda boʻyoq, lak, yelim va maishiy kimyo mahsulotlarida ishlatiladigan erituvchilar bor.

Majmuaning keyingi bosqichi 2028-yil oxirigacha yakunlanishi rejalashtirilgan. Korxona yiliga qariyb 180 ming tonna neft-kimyo mahsulotlari, avtomobil benzini va dizel yoqilgʻisini Qozogʻiston, Qirgʻiziston, Tojikiston, Turkmaniston, Afgʻoniston va Yevropa Ittifoqiga eksport qilishni rejalashtirmoqda. Shuningdek, 2028–2030-yillarda 150 ming tonna suyultirilgan gazni qayta ishlash loyihasi boʻyicha xorijiy hamkorlar bilan muzokaralar olib borilmoqda. Prezident eksport salohiyatini oshirish va texnologlar, muhandislar, kimyogarlar hamda laboratoriya xodimlarini tayyorlashni tavsiya qildi.