Azərbaycan dövlət borcunun ÜDM-ə nisbətini yaxın 4 ildə sabit saxlamağı hədəfləyir

Azərbaycan hökuməti yaxın 4 ildə dövlət borcunun ümumi daxili məhsula (ÜDM) nisbətini sabit saxlamağı hədəfləyir. Report.az xəbər verir ki, bunu maliyyə naziri Sahil Babayev Milli Məclisin İqtisadi siyasət, sənaye və sahibkarlıq komitəsinin 2027-ci ilin büdcə zərfinin müzakirəsinə həsr olunmuş iclasında bildirib.

Nazirin sözlərinə görə, 2026-cı ilin sonuna dövlət borcunun ÜDM-ə nisbətinin 20 %, 2030-cu ilin sonuna isə 20,3 % olacağı gözlənilir. Babayev Azərbaycanın bu göstəriciyə görə dünyada ən yaxşı göstəricilərə malik ölkələr arasında olduğunu vurğulayıb. 23,9 milyard manatlıq borc portfelinin 16,2 milyard manatı daxili, 7,7 milyard manatı isə xarici dövlət borcudur.

İstiqrazlar üzrə borcun orta ödəmə müddəti 3,6 ilə çatıb, portfeldə 7 və 10 illik istiqrazların payı 44 % təşkil edir. Nazir növbəti dövrdə borcun orta ödəmə müddətinin artırılmasını və qısamüddətli borclanmaların orta və uzunmüddətli borclanmalarla əvəz edilməsini planlaşdırdığını bildirib.