Qırğızıstan prezidenti Sadır Cəparov Qazproma qaz şəbəkəsini milliləşdirmə ilə hədələdi

Qırğızıstan Prezidenti Sadır Cəparov, Rusiyanın “Qazprom” şirkəti qazlaşdırma öhdəliklərini yerinə yetirməsə, ölkənin qaz sisteminin dövlət nəzarətinə qaytarıla biləcəyini bildirib. O, bunu noyabrın 3-də Talas vilayətinin Aytmatov və Manas rayonlarının sakinləri ilə görüşdə açıqlayıb.

Cəparov xatırladıb ki, 2013-cü ildə qaz sistemi rus şirkətinə simvolik bir dollara satılıb və razılaşma təxminən 2039-cu ilə qədər qüvvədədir. Onun sözlərinə görə, Qırğızıstan ərazisini müstəqil qazlaşdıra bilmir və bütün məsələlər sistemin sahibi “Qazprom”la razılaşdırılmalıdır. O, son iki-üç ildə bu öhdəliklərin yerinə yetirilməsi məsələsini gündəmə gətirdiyini deyib.

Cəparov şirkət nümayəndələrinə “Kumtor kimi sistemi geri alıb özüm qazlaşdıracağam” dediyini bildirib. 2021-ci ildə Kanadanın Centerra Gold şirkəti ilə uzun mübahisədən sonra dövlət nəzarətinə keçən Kumtor qızıl mədənini xatırladıb. “Qazprom” hələlik şərh verməyib.