Rubio: Münasibətləri möhkəmləndirmək üçün getmək istədiyimiz ölkələr var

ABŞ Dövlət katibi Marko Rubio Özbəkistana səfərinin və “C5+1” formatında görüşün səbəbini izah edib. O, Andrews Birgə Bazasından Özbəkistana yola düşməzdən əvvəl jurnalistlərlə söhbətində bu barədə danışıb. Dünyada müxtəlif böhranların baş verdiyi və qeyri-sabitliyin hökm sürdüyü bir vaxtda niyə məhz indi Özbəkistanı seçdiyi soruşulanda, Rubio səfər vaxtının beş ölkənin liderləri üçün münasib günlərə düşdüyünü bildirib.

“Bu, yalnız Özbəkistanla bağlı deyil, Mərkəzi Asiyanın digər dörd ölkəsi ilə bağlıdır” deyən Rubio, qlobal böhranlar üzündən mühüm strateji səfərlərin təxirə salındığını, lakin Vaşinqtonun tərəfdaş ölkələrlə münasibətləri inkişaf etdirməyə xüsusi diqqət yetirdiyini qeyd edib. Yaxın həftələrdə Yunanıstana, bundan əvvəl isə Latın Amerikasına getdiklərini əlavə edib. Görüşdə Özbəkistan, Qazaxıstan, Qırğızıstan, Tacikistan və Türkmənistanın xarici işlər nazirləri iştirak edəcək. Həmin gün Özbəkistanın XİN rəhbəri Baxtiyor Saidov və Rubio ikitərəfli genişləndirilmiş strateji tərəfdaşlıq dialoqunun ilk mərhələsini keçirəcək. Sergio Gorun sözlərinə görə, görüşdə regional iqtisadi əlaqələr, enerji təhlükəsizliyi və regionun aktual məsələləri üzrə birgə həllərə diqqət veriləcək.