Mirziyoyev Buxarada 55 layihəni istifadəyə verdi, 90 layihənin tikintisinə başladı

Özbəkistan Prezidenti Şavkat Mirziyoyev Buxara vilayətində yeni obyektlərin istifadəyə verilməsi və bir sıra layihələrin tikintisinin başlanması mərasimində iştirak edib. Dövlət başçısının mətbuat xidməti məlumat verib ki, proqram ümumi dəyəri 7,8 milyard dollar olan 145 layihəni əhatə edir.

Layihələr neftkimya, toxuculuq, tikinti materialları, maşınqayırma, enerji, mədənçıxarma, farmasevtika, rəqəmsal texnologiyalar, logistika, kənd təsərrüfatı, qida, mənzil tikintisi, infrastruktur, xidmət və turizm sahələrini əhatə edir. 654 milyon dollar dəyərində 55 layihə istifadəyə verilir, 7,1 milyard dollar dəyərində 90 layihənin tikintisinə başlanılır. Layihələrdə ABŞ, Almaniya, Yaponiya, Çin, Türkiyə, Rusiya, Hindistan və digər ölkələrin investorları, Asiya İnkişaf Bankı və Asiya İnfrastruktur İnvestisiya Bankı iştirak edir.

Proqnozlara görə, layihələr 14 mindən çox iş yeri yaradacaq, ildə 22 trilyon som dəyərində məhsul istehsalına imkan verəcək və 510 milyon dollarlıq ixrac təmin edəcək. Mirziyoyev bildirib ki, məqsəd idxalı əvəz edəcək və xarici bazarlarda tələb olunacaq məhsullar istehsal etməkdir.