Shavkat Mirziyoyev Buxoroda 55 ta loyihani ishga tushirdi, 90 tasining qurilishini boshladi

Oʻzbekiston Prezidenti Shavkat Mirziyoyev Buxoro viloyatida yangi obyektlarni ishga tushirish va bir qator loyihalar qurilishini boshlash marosimida ishtirok etdi, deb xabar berdi davlat rahbarining matbuot xizmati. Dastur umumiy qiymati 7,8 milliard dollar boʻlgan 145 ta loyihani oʻz ichiga oladi.

Loyihalar neft-kimyo, toʻqimachilik, qurilish materiallari, mashinasozlik, energetika, konchilik, farmatsevtika, raqamli texnologiyalar, logistika, qishloq xoʻjaligi, oziq-ovqat, turar joy qurilishi, infratuzilma, xizmat koʻrsatish va turizm sohalarini qamrab oladi. 654 million dollarlik 55 ta loyiha ishga tushirilmoqda, 7,1 milliard dollarlik 90 ta loyihaning qurilishi boshlanmoqda. Loyihalarda AQSh, Kanada, Germaniya, Yaponiya, Xitoy, Turkiya, Rossiya, Hindiston va boshqa mamlakatlar investorlari, shuningdek, Osiyo taraqqiyot banki ishtirok etmoqda.

Prognozlarga koʻra, loyihalar 14 mingdan ortiq ish oʻrni yaratadi, yiliga 22 trillion soʻmlik mahsulot ishlab chiqarishni yoʻlga qoʻyadi va 510 million dollar eksportni taʼminlaydi. Mirziyoyev shunday dedi: “Bizning yagona maqsadimiz — importni almashtiradigan va tashqi bozorlarda talab qilinadigan mahsulot ishlab chiqarish”.