Energetika sohasining 2050 yilgacha boʻlgan Milliy bosh rejasi ishlab chiqiladi

Oʻzbekistonda energetika sohasining 2050 yilgacha boʻlgan Milliy bosh rejasi birinchi marta ishlab chiqiladi va ochiq eʼlon qilinadi, deb xabar bermoqda UzA. Prezident Shavkat Mirziyoyev ayni paytda yoqilgʻi-energetika sohasidagi investorlar bilan ochiq muloqot oʻtkazmoqda.

Kelgusi yilning 1 martigacha tarmoqlarga ulanish imkoniyatlari xaritasi, 1 iyulgacha esa toʻliq bosh reja taqdim etiladi. Hujjatlarda qaysi hududda elektrga talab oʻsishi, qanday infratuzilma zarurligi va yangi quvvatlar qayerda samarali ishlashi koʻrsatiladi. Shu asosda investorlar ham oʻz rejalarini uzoq muddatga tuzishi mumkin boʻladi.

«Yashil» energiya ishlab chiqaruvchilar uchun sertifikatlar va karbon kreditlardan qoʻshimcha daromad olish imkoniyati ham ochiladi. Ulardan keladigan manfaatni davlat va investorlar oʻrtasida adolatli taqsimlash mexanizmlari joriy etiladi. Jarayonda xalqaro ekologik majburiyatlar va amaldagi shartnomalar toʻliq hisobga olinadi.